بتحبني...؟ طب ايه الدليل ؟؟؟؟؟؟؟؟

موضوعي معاكم النهاردة عايزة اناقشكم فيه
بيتهيألي كتير مننا مروا بيه او بيعانوا منه وممكن كمان يكونوا مش عارفين يتصرفوا فيه ازاي
معلش اذا كنت ممكن اطول عليكم شويه عشان الموضوع ده شاغلني حبتين يعني

الموضوع هو موضوع الارتباط بين الشباب و البنات
وبالأخص هزود شويه على موضوع الشباب لأن البنت عموما هي بتخسر اكتر من الولد
انتشرت دلوقتي حكايه الارتباط وطبعا كلنا او معظمنا مرينا بتجربه حب او ارتباط
او حتى ممكن تكون مشاعر جوانا بس معبرناش عنها للي بنحسها تجاهه
بس حسينا احساس الحب
ممكن ييجي الحب ده عن طريق الجامعه او عن طريق الجيرة او القرابه او انتشرت اوي من على النت
وبردو هزود شويه عن موضوع النت ده
في كتير بيرتبطو عن طريق النت وساعات الموضوع بيمشي ويكمل وتوصل لخطوبه وجواز وساعات بردو الموضوع كله بيبقى تسالي ولعب بالمشاعر وتقضيه وقت وخلاص وده المنتشر غالبا لان نسبه نادرة جدا وممكن تكون معدومه ان الموضوع يكمل ويتم للأخر

هقولكم على حاجه

لما تبقى بنت بتحب واحد جدا وهو يبقى بيحبها اوي هو كمان لكن في حاجات ناقصه في العلاقه دي اللي هي قله الثقه من البنت تجاه الولد او البنت بتعمل تصرفات متعجبش الولد يعني والمشاكل اللي كلنا عارفينها دي هل العلاقه دي ممكن تكمل رغم انه يقولها احنا هنقيم بعض ولو عرفنا بعض كويس وحسينا اننا مناسبين لبعض هاجي اتقدملك من غير كلام

مش بزمتكو ده اللي بيحصل دلوقتي ؟
في منكم هيقولي اه بيحصل ؟ وانا هبقى معاه في الرأي ده
وفي منكم هيقولي لا مش بيحصل ؟ وده هسأله هقوله لما هو مش بيحصل ليه بيرتبط بيها من الاول ويمشي معاها ويروح هنا وهنا وتليفونات ويقضوها مع بعض وفي الاخر يا يكملو يا ميكملوش وطبعا في النهايه البنت هي اللي بتخسر لانها اكيد هتكون اتنازلت عن حاجات كتير واولها قلبها وثانيا هتنزل من نظر نفسها لما تفتكر التليفونات والخروج والكلام ده
الولد بقى قولولي ايه اللي هيكون خسره ؟ ولا حاجه لا سمعته ولا اي حاجه تبقى نقطه سودة في حياته مهما كان البنت بتخرج خسرانه

لكن نرجع بردو لموضوعنا لما البنت تيجي تلاقي الموضوع طول بينهم ويبدأ يتقدملها عرسان لأهلها في البيت وترفض عشان بتحب واحد تاني طبعا مش بتقول كده في البيت وتروح تقول للي هي مرتبطه بيه ده انا جايلي عريس واهلي موافقين يبدأ يتنرفز ويتعصب وطبعا ارفضي يعني ايه حد ياخدك مني لالالالالا ومش عارف ايه تقوله طيب وبعدين ويتكرر الموضوع ده ولما تقوله يقولها ان ابحبك وكل حاجه واقدر اخطبك بس لما اعرفك كويس الاول ونعرف هننفع لبعض ولا لا
تقوله طب مش انت بتحبني ؟ يقولها اه بحبك انتي جايه دلوقتي تسأليني اذا كنت بحبك ولا لأ
تقوله طب ايه الدليل يعني انت لو بتحبني ايه اللي مانعك انك تيجي تتقدملي ولو حتى تكلم ماما او حد في البيت يبقى عارف الموضوع يقولك لا لما نتأكد الاول احنا هننفع بعض الاول ولا لأ عشان منندمش على اي حاجه بعدبن نحكم الاول على بعض وبعدين نشوف الامور هتمشي ولا لأ لو مشيت يقى خير وبركه لو ممشيتش يبقى خلاص كل واحد يروح لحاله من برة برة لان الحب مش كل حاجه لازم يبقى في تفاهم وثقه وحاجات كتير مع الحب

ممكن اوافق على النقطه دي لكن هقول هو مش الحب ده اللي بيعمل المستحيل
الحب ده اللي بيخليك تستحمل حبيبك حتى لو كان ايه
او زي ما بيقولو مرايه الحب عاميه
ليه مستحملش حبيبي على عيوبه ؟

تيجو نسأل نفسنا سؤال؟؟؟؟؟
ليه دلوقتي الشباب والبنات بيبقوا عايزين اللي هيتجوزوهم دول يكونوا عارفينهم قبل الخطوبه والجواز وكده او بمعنى اصح يكونوا مرتبطين قبل الخطوبه عشان يعرفوا بعض كويس عشان على رأيهم ميتدبسوش في الجوازة والله زي ما بقولكم سمعت الكلام ده من شباب كتير في الجامعه يقولولك ايه لالالالالالالا البنت اللي هتجوزها دي لازم اكون عارف اصلها وفصلها وحصلها ايه من يوم ما اتولدت قبل ما افكر مجرد التفكير اني اروح اتقدملها في بيت اهلها بالرغم من انهم ممكن يكونوا ماشين مع بنات واقنعوهم تماما انه مبيحبوهم وهيخطبوهو و كده

ولما تيجي البنت تطلب منه انه ييجي يتقدملها يقولها لا يا حبيبتي انا لسه معرفتكيش كويس بعدين بقه نبقى نشوف الموضوع ده هي تقوله الله !!! هو مش انت بتحبني ؟؟
يقولها اه يا حبيبتي ده انا بموت فيكي تقوله طب ايه الدليل تعالى اتقدملي يقولها لا مش دلوقتي

اقولكم ايه السبب في كده ودي وجهه نظري
ان الشباب و البنات مبقوش يثقوا في بعض كله بيضحك على كله البنات بتصرفاتها ولبسها وحركاتها والحاجات اللي كلنا عارفينها دي خلت الشاب يفكر مليون الف مرة قبل ما ييجي انه يتجوز
والشباب بردو بتصرفاتهم وتمثيلهم وعدم جديتهم في علاقاتهم بالبنات وانهم بيتسلوه بيهم خلو البنات كمان مش واثقه فيهم لانهم هيبقوا شاكين في تصرفاتهم وكلامهم ووعودهم اللي مش بتتنفذ للأسف الحب دلوقتي بقى عمله نادرة ويابخت اللي يلاقيها
ياريت كل واحد وكل واحده فينا لو بيحب بجد يكمل حبه ده بالجديه ولخطوبه وكل حاجه تبقى في النور وهو ده هيبقى اكبر دليل على الحب وصدق المشاعر
ولو حد فينا بيتسلى بحد نقوله بلاش وننصحه ونرشده للخير عشان لو مش بيحبوا بعض بجد هيكون ايه دليل الحب

يارب اكون ساهمت ولو بفكرة بسيطه تخلينا نعرف بجد احنا بنحب ولا بنتسلى
ومعلش لو طولت عليكم
[ندعوك للتسجيل في المنتدى أو التعريف بنفسك لمعاينة هذا الرابط]
تحياتي
يــويــو